Шуурхай мэдээ New

etoim.mn
photos/77d1e5b78ce30828big.jpg

Нэгдүгээр сарын 10-ны тогтуун сайхан өдөр Архангай аймгийн төв Цэцэрлэг хотноо “Нутгийн удирдлагын ордон”-ы хурлын танхимд АН-ын даргын сонгуульд нэр дэвшигчид мөрийн хөтөлбөр танилцуулах уулзалт хийв. Уулзалтад Архангай аймгийн АН-ын гишүүдийн төлөөлөл болох 300 гаруй гишүүд оролцлоо. АН-ын даргын сонгуульд нэр дэвшигч Н.Алтанхуяг уулзалтыг эхлүүлэв. Тэрбээр намын даргын сонгуульд гурван учир шалтгааны улмаас оролцож байгаа аж. Нэгдүгээрт, Хагас бүтэн сайнгүй ажиллаж байсан Шинэчлэлийн Засгийн газрыг нам дамнасан бүлэглэл огцруулж МАНАН-гийн Засгийн газар хийж эхэлсэн бүх ажлыг нь зогсоосон. Ийм учраас олон мянган намын гишүүд намын даргад өрсөлдөхийг санал болгож утсаар ярьсан, гар утсаараа богино зурвас бичиж дэвшихийг шаардсан. Хоёрдугаарт, ардчилал улам хэврэг болж дарангуйлагч нийгэм тогтож байгаа учраас. Гуравдугаарт, нам дамнасан луйварчид хуйвалдан шударга ёсыг устган Монгол Улсын баялгыг цөлмөх гэж байгаа учраас энэ сонгуульд оролцож байгаагаа гишүүддээ хэлэв. Хоёр зуун гишүүдээс биш хорин мянган гишүүдээс бус 176 мянган гишүүдийн итгэлийг хүлээж даргаар сонгогдоно гэдэгтээ итгэлтэй байна билээ. Түүний дараа намын даргын сонгуульд нэр дэвшигч, УИХ-ын гишүүн Д.Эрдэнэбат: Ардчилсан нам шинэ санаа, шинэчлэлийг Монголын улс төрд авчирдаг. АН байхгүй бол Монголд Ардчилал байхгүй болно. 2020 оны УИХ-ын сонгуульд хэн АН-ын нүүр царай болж чадах вэ? Тэр хүнийг л намын гишүүд минь сонгоод өгчих. Тэгж чадвал энэ чинь та нарын минь гавъяа шүү гэж хэлэв.  АН-ын даргад нэр дэвшигч УИХ-ын гишүүн Ж.Батзандан: Архангайчууд МАХН-ын хэлмэгдүүлэлтэд хамгийн их зовсон аймаг гэдгийг бид бүгдээрээ мэднэ. Миний хоёр авга ах Лоохууз, Сурмаажавын хэрэгт холбогдон 25 жил нутаг заагдаж байлаа. Бас гурван авга ах минь 37 онд хилс хэргээр буудуулсан. Төрсөн долоон ах минь АН-ын анхны гишүүд. Аав минь Сүхбаатар аймаг дахь МОАХ-ны үүсгэгчдийн нэг учраас би яснаасаа ардчилсан либерал үзэлтэй гээд мөрийн хөтөлбөрөө танилцууллаа. Нэр дэвшигч УИХ-ын гишүүн С.Эрдэнэ: Манай нам маш олон гишүүдийг төрийн албан тушаал, өндөр эрх мэдэлд хүргэснийг та бүхэн мэднэ. Намын ачаар өөдөө дэвшсэн гишүүдийн ихэнх нь хэрэгт холбогдохоороо МАН-ын суганд ороод нуугдчихдаг. Эсвэл нам сонгуульд ялагдахад гадагшаа зугтаадаг. Тэгээд сонгуулийн жил хүрч ирээд албан тушаал худалдаж авдаг. Би хэзээ ч ингэж байгаагүй. Ялахад нь ч байдгаараа байсан. Ялагдахад нь ч байдгаараа байсан. 2008 оны долдугаар сарын 1-нээс хойш гурван өдөр зурагтын нэг сувагтай сонин, интернетгүй байж үзсэн шүү дээ бид. Тэр үед миний хүүхдүүд ямар аймшигтай юм бэ гэж байсан. Ардчиллыг үр хойчдоо ойлгуулж чадаагүйн бидний буруу шүү хэмээн бас л бодууштай үг хэлж, мөрийн хөтөлбөрийг минь сайн уншаараа гээд товхимолоо өндөрт өргөн харууллаа.  Түүний дараа АН-ын даргад нэр дэвшигч Л.Гантөмөр: “Намын даргад нэр дэвшигчдийн нэрээ татах хугацаа өнөөдөр дуусч байна. Хэн ч нэрээ татсангүй. Манай гишүүд мэдээллийн хэрэгслүүдээр гарч байгаа хов жив худлаа гэдгийг харж байгаа биз” гээд мөрийн хөтөлбөрөө танилцуулав. Архангай аймаг дахь намын гишүүдтэйгээ таван цаг гаруй хөөрөлдсөн нэр дэвшигчид Цэцэрлэг хотноо хоноглоод өглөө эртлэн Улаанбаатар хотын зүг хөдлөв.  Энэ сарын 12-нд АН-ын даргын сонгуульд нэр дэвшигч таван эрхэм Баянзүрх, Чингэлтэй дүүргийн АН-ын гишүүдтэйгээ мөрийн хөтөлбөрөө танилцуулах уулзалт хийж өнжив. Үйлдвэрчний эвлэлийн соёлын ордонд болсон Чингэлтэй дүүргийн АН-ын гишүүдтэй хийх уулзалтын салхийг хагалан намын даргын сонгуульд нэр дэвшигч УИХ-ын гишүүн Д.Эрдэнэбат “Өнөөдөр би зөөлөн ярина аа. АН ялахад ялалтын олз ашиг хайж ирсэн ялаанууд нисээд явчихдаг юм билээ. Энэ танхимд үнэнч гишүүд минь үлдээд сууж байна. Тийм учраас зөөлөн ярина. Манай намын 20 мянган гишүүн ажил амьдралгүй болчихоод байна. Лидерүүдийнхээ алдаанаас болж. Би намын даргад дөрлөгдсөн Ерөнхийлөгч, Ерөнхийлөгчид дөрлөгдсөн намын дарга АН-д хэрэггүйг ойлгосон. Хэрвээ би намын дарга болбол 2020 оны сонгуульд намаа ялуулж чадна гээд мөрийн хөтөлбөрөө танилцууллаа. Түүнийг удаалан намын даргад нэр дэвшигч УИХ-ын гишүүн С.Эрдэнэ: Бид ардчиллыг олон түмэнд ойлгуулах баримтат кино, ном зохиол хангалттай гаргаагүй нь ялагдлын бас нэг шалтгаан шүү. 1989-1990 онд гурвуулаа байгаа мөнгөө нийлүүлж хоёр хуушуур аваад крантны усаар даруулж идээд ардчиллын төлөө жагсаж энэ эрх чөлөөг авчирсныг одоогийн залуус мэдэхгүй. Эхэлж намаа шинэчилчихээд 65 коммунисттай яс тэмцэж Монголын ардчилалыг хамгаална гэв. Харин намын даргад нэр дэвшигч УИХ-ын гишүүн Ж.Батзандан: Монгол  төр босоо удирдлагатай. Манай нам хэвтээ тогтолцоотой. Иймд намаас төрийн албанд очсон гишүүдээс хэл ам тасардаггүй. Ийм намыг иргэний, ардчилсан хоёр тулгуурт нам болгох хэрэгтэй. Бас цахим ардчилсан нам болгох хэрэгтэй. УИХ-д ардчиллын есөн өрлөг байна. 2000 онд нэг өрлөгтэй байхдаа ч босож ирж байсан юм шүү гэсэн билээ.  Намын даргад нэр дэвшигч Л.Гантөмөр: 1990 оны хоёрдугаар сарын 18-нд энэ танхимд АН-ын чуулган болж байсан юм. Гэтэл одоо Чингэлтэй дүүргийн АН-ын төлөөлөл цуглаад энэ танхимыг дүүргэж байна.  Бид ямар олуулаа болоо вэ гээд мөрийн хөтөлбөрөө танилцуулав. Намын даргад нэр дэвшигч Н.Алтанхуяг “Би 2001 онд Сонгинохайрхан дүүргийн намын даргаар нэг жил ажилласан юм. Дүүргийн намын амьдралыг мэднэ. 2016 оны УИХ-ын сонгуулийн нэр дэвшүүлэх хугацаанаас хоёр цагийн өмнө манай нам нэр дэвших хүн хайгаад явж байсан шүү. Нам ингэж доошоо орж болохгүй гэж үгээ эхэлсэн юм. Намын гишүүд нэр дэвшигчдээс асуулт асууж санал сэтгэгдлээ хэлэх үеэр Чингэлтэй дүүргийн 19-р хорооны намын гишүүн “Сая АН-д гишүүнээр элссэн “Буян” компанийн захирал Д.Жаргалсайхан гэж хүн манай хорооны намын гишүүдийг намд гишүүнээр элссэн баяртаа урьж дайлж цайлах үедээ “Та нар зарим нэг хүмүүсийг намын даргаар сонгож болохгүй шүү” гэж нэр заан ухуулга хийж байсан. Ингэж болдог юм уу гэж асууж байлаа. Өвөрхангай аймагт болсон намын гишүүдэд мөрийн хөтөлбөр танилцуулах уулзалтын үеэр мөнөөх “Буян”-гийн Жагаа бас л оччихсон явж байгаа харагдсан.  

Д.Нацагдоржийн шагналт, яруу найрагч Б.Галсансүх  

Эх сурвалж: www.assa.mn

Таалагдахгүй байна

0
0

АНХААРУУЛГА

Уншигчдын бичсэн сэтгэгдэлд etoim.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.

1.0

Сэтгэгдэл үлдээх