Шуурхай мэдээ New

etoim.mn
photos/5dd4d878040fe.jpeg

УИХ-ын Эдийн засгийн байнгын хорооны хуралдаанаар Оюутолгой ордын ашиглалтад Монгол Улсын эрх ашгийг хангуулах тухай тогтоолын төслийг хэлэлцэж, дэмжлээ.

Тогтоолын төсөл хоёр зүйлтэй. Нэгдүгээр зүйлээр Оюу толгой төслөөс Монголын талын хүртэх үр ашгийг дээшлүүлэх чиглэлээр хэд хэдэн ажил өрнүүлэхийг Засгийн газарт даалгах юм.

Үүнд:

- Засгийн газар, “Рио Тинто интернейшнл холдинг” болон “Айвенхоу Майнз” компанийн 2009 оны 10 дугаар сард байгуулсан Хөрөнгө оруулалтын гэрээ, 2011 онд байгуулсан “Эрдэнэс Монгол”, “Айвенхоу Оюу Толгой”, “Оюу Толгой Нидерланд Би Ви”, “Оюу Толгой” компанийн Хувь нийлүүлэгчдийн гэрээг УИХ-ын 2008 оны “Үндсэн зарчим, удирдамж батлах тухай” тогтоол, 2009 оны “Оюу толгойн ордыг ашиглах хөрөнгө оруулалтын гэрээний тухай” тогтоол болон Монгол Улсын хууль, тогтоомжийн хүрээнд сайжруулах цогц арга хэмжээ авах, энэ чиглэлд Олон улсад хүлээн зөвшөөрөгдсөн хараат бус зөвлөх үйлчилгээ авахыг даалгаж буй юм.

- Засгийн газар, “Оюу Толгой”, “Ресурс Лимитед”, “Ти Эйч Ар Оюутолгой”, “Оюу Толгой Нидерланд”, “Рио Тинто интернейшнл холдинг” компанийн 2015 онд байгуулсан Оюу толгой төслийн далд уурхайн бүтээн байгуулалт, санхүүжилтийн нэмэлт төлөвлөгөөг Монгол Улсын эрх ашиг, хууль, тогтоомжид нийцүүлэн сайжруулах

- Оюу толгой төслөөс хүртэх Монголын талын үр өгөөжийг хөрөнгө оруулалтын гэрээ болон 2010 оны ТЭЗҮ-ийн тооцоололд зааснаар 53 хувиас бууруулахгүй байх хүрээнд Монголын талын 34 хувийн хувьцааг бүтээгдэхүүн хуваах нөхцөл, эсхүл АМНАТ-өөр оруулах хувилбарыг судлан шийдвэрлэх, шаардлагатай тохиолдолд холбогдох хууль, тогтоомжид өөрчлөлт оруулах санал боловсруулан УИХ-д танилцуулах

- Оюу толгойн ордын зэс, алт, мөнгө болон бусад дагалдах элементын нөөцийн үнэлгээг Монгол Улсад мөрдөж буй олон улсын стандартын дагуу дахин хийж, үүнд үндэслэсэн ТЭЗҮ-г дахин боловсруулж, эрх бүхий байгууллагаар дүгнэлт гаргуулах

- Байгаль орчны болон усны нөхцөл байдлын үнэлгээг Говийн бүсийн гүний ус ашиглах нөхцлийг харгалзан тогтоох

- УИХ-ын даргын захирамжаар байгуулсан Оюу толгой ордыг ашиглах, хөрөнгө оруулалтын гэрээний хэрэгжилтийг шалгах ажлын багийн санал, дүгнэлтийг хэрэгжүүлэх цогц арга хэмжээ авах

- Оюу толгой төслийн Монголын талын төлөөллийг хэрэгжүүлэгч байгууллагын санхүү болон хүний нөөцийн чадавхыг олон улсын түвшинд хүргэж бэхжүүлэх

Уг тогтоолын хэрэгжилтийг хангахыг УИХ-ын эдийн засгийн байнгын хороонд хоёрдугаар зүйлээр үүрэг болгох юм. Энэ тогтоолын төсөл нь Оюу толгой төсөлтэй холбоотой гэрээнүүдийг цуцлах, төслийг зогсоох бус сайжруулахад чиглэж байгаа хэмээн УИХ-ын гишүүн Т.Аюурсайхан танилцуулав.

УИХ-ын гишүүн Т.Аюурсайхан: Монгол Улсын эрх ашигт нийцүүлэх сайжруулах  гэдэг нь далд уурхайн бүтээн байгуулалт, санхүүжилтийн нэмэлт төлөвлөгөө хоёр талын эрх ашигт нийцсэн байх ёстой. Ингэхдээ Монгол Улсын эрх ашиг орхигдох ёсгүй. Энэ асуудалд Монгол Улсын эрх ашиг  санхүүжилт, менежментийн талаар тусгах ёстой гэж гэрээний хэрэгжилт, тогтоолын төслийг боловсруулах ажлын хэсэг санал нэгдэж байгаа. Цуцлах, хаах болиулах гэхээсээ гэрээг сайжруулж, Монгол Улсын эрх ашигт нийцүүлэх хэрэгтэй 

ЗГХЭГ-ын дарга Л.Оюун-Эрдэнэ:  УИХ дээр ажлын хэсэг байгуулагдаад дүгнэлт нь гараагүй учир Засгийн газар "Оюутолгой" ордын гэрээний талаар тодорхой зүйл хийх улс төрийн боломжгүй байсан. Ажлын хэсгийн дүгнэлтийг хэлэлцэж, нэг талдаа гаргаж байгаад баяртай байна. Ер нь маргаантай, цаашид анхаарах зүйл байгаа. Гэхдээ бид ямар арга замаар, яаж шийдэх вэ? Засгийн газар УИХ-ын тогтоолын хүрээнд ажиллана. 

Тогтоолын төслийг байнгын хорооны гишүүдийн 80 хувь дэмжиж, санал, дүгнэлтээ УИХ-ын чуулганы нэгдсэн хуралдаанд танилцуулахаар тогтлоо.

 

Таалагдахгүй байна

1
0

АНХААРУУЛГА

Уншигчдын бичсэн сэтгэгдэлд etoim.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.

1.0

Сэтгэгдэл үлдээх